CHUO CHA VETA MIKUMI CHAPEWA NOTISI

HALMASHAURI ya wilaya ya Kilosa Mkoani Morogoro imetoa notisi ya siku 14 kabla ya kuchukua hatua kwa uongozi wa Chuo cha veta mikumi, Wakitaka walipe  kodi ya hoteli,  “hoteli levvy’ ya shilingi milioni tano kwa halmashauri hiyo, kutokana na kuendesha mgahawa chuoni hapo.

Mkuu wa chuo cha VETA Mikumi, Christopher Ayo,amekiri kupokea notisi hiyo ya Halmashauri ya Wilaya ya Kilosa kwa deni lililotajwa kama ni kodi ya kipindi cha 2014 hadi 2017  lakini akafafanua kuwa mgahawa uliopo chuoni hapo hauendeshwi kibiashara bali ni sehemu ya mafunzo  kama ilivyo kwa  karakana nyingine za ufundi ukiwemo  wa magari,uhunzi, umeme, useremala, mitambo na karakana zingine ambazo zimekuwa zikiendesha mafunzo kwa vitendo.

Amesema bidhaa zinazotengenezwa zimekuwa zikitengenezwa kwa kutumia ruzuku ya fedha za Serikali na wamekuwa wakiziza na mapato yake kurudi upya Serikalini na baadaye kutumwa upya kama Ruzuku ili kusaidia  chuo hicho kuendesha kozi husika.

Ayo amesema ni vyema wadau wa Serikali wakatambua  namna mamlaka hiyo inavyofanya kazi zake, badala ya kuchukua maamuzi bila kuwashirikisha na kwamba baadhi ya mamlaka zingine na hata Uongozi wa wilaya uliopita walikuwa wakitambua uendeshaji wa mafunzo katika chuo hicho na vingine vya VETA.

Aidha amesema katika kuboresha mafunzo ya Ukarimu chuoni hapo, Shirika lisilo la kiserikali la With Tanzania kupitia Shirika la Maendeleo la Korea Kusini, KOIKA, wamekipatia Veta Mikumi  msaada wa mashine za kisasa za thamani ya shilingi milioni hamsini kwaajili ya kuokea mikate na vyakula vinavyotumia unga kusaidia  mafunzo kwa wanafunzi wa hoteli,utalii na wadau wengine watakaohitaji kujifunza.

Amesema kufuatia msaada huo, wameamua kuanzisha duka la bidhaa za Mikate na vyakula vinavyotumia unga, ili vinunuliwe kwa bei nafuu na wafanyabiashara wanaozunguka maeneo yao na wakiweza watumie kuuza katika maeneo yao.

Akihimiza umuhimu wa  vijana kutumia mafunzo ya ufundi kujiajiri, Meneja Rasilimali watu kutoka kiwanda cha Sukari cha Kilombero ambaye pia ni mjumbe wa bodi ya wakurugenzi ya Veta Kanda ya Mashariki,Beda Marwa, amezishauri  taasisi za kifedha kutoa mikopo kwa vijana ili wapate mitaji ya kujiajiri.

Aidha baadhi ya wahitimu wa chuo hicho akiwemo Joyce Rafaely mkazi wa Turiani aliyekuwa mwanamke pekee kati ya wanafunzi 43 waliokuwa wakijifunza ufundi wa magari amesema ameamua kujikita katika kozi hiyo iliyoonekana zaidi kufanywa na wanaume baada ya kuchungulia fursa nyingi zilizopo, na kwamba anaamini kwa kutumia jinsia yake na ufundi uliobobea, atapata kazi nyingi zitakazomuwezesha kuendesha maisha yake.

Mwisho.

KILOSA WATAKIWA KUTENGA BAJETI YA UKARABATI WA MTO

Serikali imeuagiza uongozi wa Wilaya ya Kilosa Mkoani Morogoro kutenga fedha kila mwaka inapopanga bajeti yake kwa ajili ya dharura na ukarabati wa tuta la mto Mkondoa ili kuepusha madhara yanayotokea kwa wananchi wa Mji huo hususani wananchi wa kata ya Mbumi kipindi cha mvua.

Agizo hilo limetolewa Oktoba 22 mwaka huu na Waziri wa Nchi Ofisi ya Waziri Mkuu, Sera, Bunge, Kazi, Vijana, Ajira na Watu wenye ulemavu Mhe. Jenista Mhagama alipofanya ziara ya siku moja kujionea mwenyewe tuta ambalo linatishia uhai wa wananchi wa Mji wa Kilosa.

Waziri Mhagama amesema kila mwaka Halmashauri hiyo ihakikishe inatenga bajeti ya fedha kidogo kwa ajili ya dharura ya kukarabati tuta la mto Mkondoa na hivyo kuepusha madhara yanayoweza kuwapata wananchi wake kutokana na kubomolewa kwa tuta hilo na kusababisha mafuriko.

 “Kila mwaka Halmashauri ya Wilaya inapopanga Bajeti yake ya maendeleo ya miundombinu katika Halmashauri, hakikisheni angalau mnatenga bajeti kidogo ya ukarabati wa dharura katika tuta letu la kuokoa mafuriko kwenye mto Mkondoa, Kila mwaka hakikisheni bajeti inatengwa. Na Mhe. Diwani usikubali halmashauri ipitishe bajeti bila jambo hilo kuwepo” alisema Waziri Mhagama.

Aidha, Waziri Mhagama ameagiza Wilaya kwa nafasi yake na Mkoa kwa nafasi yao, kutumia mfumo wa maafa uliopo sasa, kukaa na kuona ni mahitaji gani yanayohitajika katika ukarabati wa tuta hilo yamo ndani ya uwezo wao na kisha kuwasilisha ofisi yake ili hatua za haraka ziweze kuchukuliwa katika kulikarabati tuta hilo kabla mafuriko  hayajatokea.

Pamoja na maelekezo hayo Mhe. Waziri Mhagama alilipokea ombi la Mkuu wa Mkoa wa Morogoro Dkt. Kebwe Stephen Kebwe, katika kulifanyia kazi ombi la ujenzi wa Bwawa la Kidete lililopo Wilayani humo lililojengwa enzi za wakolni kwa lengo la kupunguza kasi ya maji ya mto Mkondoa kabla hayajafika  Kilosa  eneo ambalo huleta madhara.

Hata hivyo, Waziri Mhagama amemwagiza Mkuu wa Wilaya ya Kilosa Adamu Mgoyi na Halmashauri kwa Ujumla  kusimamia utunzaji wa tuta hilo ikiwa ni pamoja na kutunza uoto kwenye tuta hilo na wananchi kutojishughulisha na shughuli za kibinadamu kama kilimo, ufyatuaji tofali, uchomaji moto nyasi na kuwachukulia hatua wote wanaokwenda kinyume na utunzaji wa tuta hilo.

Naye Msimamizi wa ujenzi wa tuta hilo kutoka jeshi la wananchi wa Tanzania Meja YA Mgugule, amesema ili tuta la mto Mkondoa lenye urefu wa M. 4,360 na kimo cha wastani wa M. 5 liweze kufikia malengo kusudiwa, shughuli za kibinadamu kama kilimo, ufugaji, ufyatuaji tofali na nyingine pembezoni mwa tuta na mto lazima zikomeshwe mara moja. Aidha amesema iwepo dhamira ya kweli ya utuzaji wa tuta hilo na tathmini nyingine ya sehemu zilizoharibika ifanyike na zirekebishwe kabla ya mvua za masika hazijaanza kunyesha. 

Ziara ya Waziri Mhagama ya kutembelea tuta hilo imetokana na Dkt. Kebwe Stephen Kebwe Mkuu wa Mkoa wa Morogoro kuwasilisha ombi lake kwa Mhe. Waziri Mkuu wa Jamhuri ya Muungano wa Tanzania Mhe. Kassim Majaliwa Majaliwa ya Kuiomba Serikali kuchukua hatua za tahadhari za kuhakikisha tuta hilo linakarabatiwa kabla halijaleta madhara kwa wananchi.

Mwisho.

ZOEZI LA KUONDOA MIFUGO KATIKA HIFADHI ZA TAIFA NI ENDELEVU.

NAIBU Waziri wa Maliasili na Utalii Josephat Hasunga, amesema serikali haitawavumulia wafugaji watakaobainika kuingiza  Mifugo katika Mapori ya Akiba na Hifadhi  za Wanayamapori.

Amewataka na wale wanaoendelea kuingiza mifugo katika hifadhihi hizo kuacha mara moja na kuondoka katika maeneo hayo, kwani kuingiza mifugo hiyo katika maeneo yaliyotengwa kwa ajili ya hifadhi ni ukiukwaji wa sheria za nchi.

 Alitoa kauli hiyo akiwa katika ziara mkoani Morogoro,na  baada kupata wasaa wa kufanya kikao cha pamoja na Viongozi wa Mamlaka ya usimamizi wa Wanyamapori nchini (TAWA).

Hasunga aliitaka mamlaka ya usimamizi wa Wanyamapori nchini, kuboresha miundombinu na  vifaa mbalimbali vinavyotumika katika kupambana na ujangili, ili kuweza kupunguza na kudhibiti matukio hayo.

Kaimu Mkurungezi wa Mamlaka hiyo, Dr James Wakibara, aalisema wameweka mikakati ya kupambana na kudhibiti ujangili katika mapori yote ya akiba nchini,na kuwataka wananchi kuacha kufanya uharamia wa wanayama katika hifadhi yoyote.

“tutambue kuwa kuvamia hifadhi ya akiba ni kosa,nivyo yeyote atakayekamtwa akifanya ujangili ndani ya hifadhi atachukuliwa hatua kali za kiseria,wananchi tuwe walinzi wa hifadhi zetu za taifa,tusikubali watu wachache wakapoteza vivituo vyetu.”Alisema.

Mwisho.

AMRI YA MKUU WA WILAYA YASHINDWA KUTEKELEZWA.

Augusti 28 mwaka huu katika kikao cha Baraza la Madiwani wa Manispaa ya Morogoro, Regina Chonjo aliagiza kuondolewa mara moja kwa vituo vyote vya kuoshea magari vilivyojengwa katika maeneo yasiyo rasmi, na kuwataka maafisa wa Mipango miji kuacha kutoa vibali kiholela vya ujenzi wa vituo hivyo,kwani maeneo hayo yametengwa kwa matumizi maalumu. 

Hata hivyo agizo hilo limeonekana  kupuuzwa, kwani baadhi ya vituo vinavyomilikiwa na viongozi ndani ya baraza hilo, vinaonekana kuendelea kufanya kazi, huku vikiwa vimejengwa katika maeneo yasiyo rasmi.

 Mkazi wa Manispaa ya Morogoro,Constatino Diego alisema kuwa agizo la mkuu wa wilaya linashindwa kutekelezwa kutokana na vituohivyo kumilikiwa na baadhi ya vigogo ndani ya manispaa hiyo ambao ndio watunzi wa sheria ndogo.

“tunaomba serikali ya mkoa kuingilia kati sakati hili ili haki itendeke kwa watu wote,sheria haichagui haingalii cheo cha mtu,wahusika wachukuliwe hatua za kisheria na kuondoka katika maeneo hayo ya wazi”Alisema 

John Mgalula ni Mkurungezi wa Manispaa ya Morogoro, yeye anakiri kuchelewa kuchukuliwa hatua kwa utekelezaji wa maelekezo yaliyotolewa na Mkuu wa Wilaya hiyo, huku  akibainisha hatua zinazoenda kuchukuliwa katika kutekeleza agizo hilo.

 Mgalula alisema Sheria ndogo na miongozo inayosimamia Manisapaaya Morogoro inatoka ndani ya Baraza hili, lakini baadhi yao wamekuwa ndiyo wa kwanza kukiuka sheria wanazozitunga, huku Kiongozi wa Madiwani katika Halamshauri hii, akiwa wa kwanza kuwataka kufuata miongozo hizo.

 Manispaa ya Morogoro iko katika mchakato wa kuelekea kuwa Jiji, lakini kutokana na changamoto mbambali zimeendelea kuchelewesha mchakato huko.   huku mpangilio usioridhisha wa baadhi ya miundomoni, ikonekana  kuchangaia.

 Mwisho.

WAKURUGENZI WAPEWA ONYO KALI

Migogoro baina ya wakuu wa wilaya,wakurugenzi pamoja na wenyeviti wa halmashauri ambayo imekuwa ikiendelea katika maeneo mbalimbali nchini na kuleta athari za kimaendeleo kwa wananchi kwa sasa imeanza kuchukuliwa hatua za kinidhamu.

Akizungumzia hatua hizo Waziri wa nchi ofisi ya Rais Tawala za Mikoa na Serikali za Mitaa (Tamisemi), Selemani Jaffo, alisema kiongozi atakayebainika kutojirekebisha pamoja na kupewa onyo zaidi ya mara mbili hatua itakayochukuliwa ni kuondolewa katika eneo alilopo.

Waziri Jaffo alisema migogoro hiyo imekuwa mtambuka katika maeneo mengi ya halmashauri hivyo wizara ya Tamisemi ikiwa ndiyo yenye dhamani imeanza kutoa mafunzo maalumu ya uongozi ili kuhakikisha viongozi hao wanafanya kazi za wananchi badala ya kuendekeza migogoro isiyoleta tija.

“Viongozi wengi baada ya kupata uteuzi walikuwa hawajapata mafunzo ya uongozi,na migogoro hiyo imekuwa ikirudisha nyuma maendeleo na waathirika wakubwa ni wananchi,”alisema

Aidha alisema migogoro hiyo inayojitokeza ni kutokana na mapungufu ya mtu mmoja mmoja katika suala la uongozi na kama wizara itafanya maamuzi stahiki endapo kunakuwa na mgogoro mkubwa kwa kushindwa kutekeleza yale aliyoelekezwa na serikali.

Waziri Jaffo hivi karibuni akiwa mkoa Morogoro alitoa maelekezo kwa halmashauri ya Wilaya ya Malinyi ambapo kulikuwa na kutoelewana baina ya ofisi ya mkurugenzi na ofisi ya mkuu wa wilaya kwa kuitaka kujirekebisha na kufanya mabadiliko kwa baadhi ya maeneo ambayo hakuyaweka wazi.

Wakati huo huo alisema kwa sasa ni kipindi cha kufanya kazi kwa uwajibikaji, nidhamu, kufanya kazi kwa juhudi, uadilifu, hivyo kuna mapungufu ambayo yamekuwa yakijitokeza kwa baadhi ya halmashauri kwa maeneo ya miundombinu ya barabara na wizara imeanza kuchukua hatua.

Alisema jambo la ubadhirifu limeanza kuchukuliwa hatua mbalimbali na Serikali na hakuna mjadala anayefanya kazi kinyume za taratibu, katibu mkuu wa wizara hiyo tayari amewachukulia hatua wahusika walioisababishia hasara Serikali katika njia moja ama nyingine.

Katika hatua nyingine Waziri Jaffo alieleza namna serikali inavyosimamia sera ya elimu kwa kufanyia ukarabati kwa shule zote za sekondari za serikali ambazo ni kongwe  kuwa za kisasa huku zikirudi katika hadhi yake na ushindani na shule nyingine hususani ya binafsi.

Alisema Serikali kupitia wizara yake ya Tamisemi itahakikisha inasimamia kikamilifu utekelezaji wa sera hiyo ya elimu kuanzaia ngazi ya awali mpaka kidato cha sita katika suala la ujenzi wa miundombinu ambalo lilikuwa limesahaurika kwa muda mrefu.

Jaffo alisema shule zipatazo 89 za serikali zinafanyiwa ukarabati ili ziwe na ubora ambao itafanya ushindani , na akaeleza kuwa shule kuwa shule 22 ambazo ni maalumu zinapewa kipaumbele.

“Nimetembelea shule ya sekondari ya wasichana ya Kilakala na shule ya sekondari ya Mzumbe ambazo ni shule maalumu,ninachowataka wanafunzi wangu msome kwa bidiii na kuhak8ikisha tunaingia katika kumi bora kitaifa kama ilivyokuwa miaka ya nyuma,”alisema

Mkuu wa shule ya sekondari ya Kilakala Renalda Salum alisema kiasi cha shilingi 935.5 milioni zimetegwa kwa ajili ya ukarabati  kwenye maeneo ya mabweni 13, madarasa nane, maabara sita, bwalo la chakula, ofisi kuu, sehemu ya kufulia nguo pamoja na miundombinu ya umeme na maji.

Mwisho..

MLEMAVU WA NGOZI AKATWA MKONO

Mzee wa miaka 75 mwenye ulemavu wa ngozi(Albino) Nassoro Msingili mkazi wa kijiji cha Nyarutanga kata ya Kisaki wilaya ya Morogoro amekatwa mkono wa kushoto na watu wasiojulikana na kutoweka nao huku watu watano wakishikiliwa kwa tuhuma za mauaji ya Afisa Tarafa Lupilo wilaya ya Ulanga.

Kaimu kamanda wa polisi mkoa wa Morogoro Leons Rwegasila akizungumza na waandishi wa habari katika ofisi za polisi mkoani hapa alisema tukio hilo lilitokea Oktoba 3 mwaka huu majira ya saa 6 usiku huko kijiji cha Nyarutanga.

Rwegasira alisema mzee Msingili akiwa nyumbani kwake amelala alivamiwa na watu wasiojulikana na kisha kumkata mkono wake wa kushoto na kukimbia nao kusikojulikana.

Alisema majeruhi huyo kwa sasa amelazwa katika kituo cha afya Dutumi na kwamba anaendelea kupatiwa matibabu na afya yake inaendelea kuimarika.

Kaimu Kamanda huyo alisema jeshi hilo kwa sasa linaendelea kuwasaka watu hao wasiojulikana na kwamba linapinga vikali mauaji na ukatili wanaofanyiwa watu wenye ulemavu wa ngozi huku likiwataka wananchi kutoa ushirikikano.

Kuhusu mauaji ya afisa tarafa Rwegasira alisema watu watano wanashikiliwa na wengine zaidi wanasakwa kuhusiana na mauaji ya afisa tarafa wa  tarafa ya Lupiro Beno Polisi wilayani ulanga mkoani morogoro aliyeuawa kikatili kwa kuvamiwa nyumbani kwake na kupigwa shoka na watu wasiojulikana.

Kaimu kamanda wa polisi mkoa wa morogoro Leons Rwegasira alisema bado upelelezi wa mauaji hayo ya kikatili unaendelea kufanywa na jeshi hilo la polisi, na kulaani vikali vitendo vya wananchi kujichukulia sheria mkononi kwa kufanya mauaji na ukatili kwa wengine.

Mkuu wa wilaya ya ulanga Jacob Kasema akizungumza kwa njia ya simu kuhusiana na taarifa za mauaji hayo alisema wamepokea kwa masikitiko makubwa taarifa za mauaji hayo,na ameviomba vyombo vya sheria kuchukuoa mkondo wake mara moja.

Kasema alisema suala la mauaji kwa viongozi wa serikali katika wilaya yake halijawai kutokea hivyo,ambapo aliwataka wananchi kuacha kujichukulia sheria mkononi pindi wanapoona kuna jambo ambalo hawalidhiki nalo na badala yake watoe taarifa kwa uongozi wa wilaya iki hatua za kisheria ziweze kuchukuliwa.

Naye afisa tarafa Mahenge Maliki Mlupu akizungumzia mauaji hayo alisema amesikitishwa na mauaji hayo na kuliomba jeshi la polisi kuwachukua hatua wale wote waliohusika na kifo hicho cha kikatili huku akiwataka kufikishwa mahakamani kwa haraka.

“Marehemu alikaribia kustaafu,imetuumiza kwa kiwango kikubwa sana,na tunaomba wananchi watoe ushirikiano kwa kutoa taarifa za wahusika

Katika hatua nyingine,polisi mkoani morogoro inawashikilia Iddy Juma mkazi wa Tabata Segerea na Aniset Ferdinand mkazi wa Tabata Mhang’ombe jijini Dar es salaam kwa tuhuma za kukamatwa wakisafirisha bangi viroba sita huko eneo la mizani ya Mikese,barabara kuu ya Morogoro-Dar es salaam.

Kaimu kamanda huyo alisema watuhumiwa hao walitumia gari aina ya toyota costa huku Ally Daudi mkazi wa vibandani kata ya Mbuyuni katika manispaa ya Morogoro akikamatwa na vichane 27 vya mirungi aliyokuwa ameficha kwenye mfuko wa sandarusi

Mwisho.

MPANGO WA MATUMIZI BORA YA ARDHI WAPUNGUZA MIGOGORO YA ARDHI.

                           

Na,Peter Kimath.
WANANCHI  wa Kijiji cha Mfumbwe Tarafa ya Mkuyuni Wilaya ya Morogoro wamesema mpango wa matumizi bora ya ardhi na kuundwa kwa mabaraza ya ardhi kumesaidia kupunguza migogoro ya ardhi iliyokuwainatokea na kuleta madhara ndani ya jamii.

Kabla ya zoezi la mpango wa matumizi bora ya ardhi,baraza lilikuwa linapokea migogoro kumi na tano kwa mwezi,lakini hivi sasa wanapokea kesi mbili tu,ambazo huzitolea suluhu na kuishia ndani ya baraza.

Hayo yalitolewa na Mwenyeiti wa baraza la ardhi, Siad Kisukari katika mdahalo ulioandaliwa na shirika lisilo la kiserikali  la Uluguru Mountains Agricultural Development Project (UMADEP) kupitia PELUM Tanzania,uliokuwa unajadili faida za mabaraza ya ardhi na mpango wa matumizi bora ya ardhi kijijini hapo.

Kisukari alisema baraza linafanya kazi kwa mujibu wa sheria,na hiii inatokana na baada ya wajumbe kupata elimu,na wananchi kuelimishwa umuhimu wa kumiliki ardhi kisheria,pamoja na kuwa hati miliki zinazotambulika.

Paulina Daniel alisema migogoro iliyoko katika kijiji hicho ni mashamba ya urithi ambayo hugombaniwa na familia,maeneo ya taasisi kuvamiwa na wananchi,na upanuzi wa barabara unaopelekea mashamba mengi kumegwa.

Ramadhani Fufumbe alisema kuwa ukosefu wa elimu katika famiia ndio unachangia kuleta migogoro ya kugawa mali za marehemu,ndio maana migogoro ya miradhi ipo sana kijijini hapo.

           

Kwa upande wake,Afisa Miradi kutoka UMADEP,Pessa Kusaga aliwataka wananchi kuhakikisha ardhi wanaoyoitumia inamilikiwa kisheria ili kuepuka migogoro ya mara kwa mara ambayo huleta uvunjivu wa amani.

Kusaga alisema kuwa faida za kuwa na hati miliki,unaweza kupata mikopokatika taasisi za kifedha,kupunguza migogoro,na pia eneo likiwa katika mpango wa matumizi bora ya ardhi unakuwa na uhakika na eneo lako.

Afisa Mifugo kutoka halmshauri ya morogoro,Pius Ntanga aliwataka wafugaji kuacha zoezi la kuhamisha mifugo,kupunguza mifugo ili kufuga kisasa kwa lengo la kuepuka migogoro kati yao na wakulima.

“kila mwananchi azingatie eneo kwa magumizi husika yaliyopangwa,mfugaji baki kwenye eneo la malisho,mkulima baki kwenye eneo la kulima,atayemwingilia mwenzake hatua kali zitachukuliwa dhidi yake”Alisema.

Mwiho.

MKAKATI WA CoST WAJENGEA UWEZO WANAHABARI NA ASASI ZA KIRAIA

 Mkakati wa Uwazi na Uwajibikaji katika Sekta ya Ujenzi (Construction Sector Transparency Initiative – CoST Tanzania) hapo jana imeendesha Warsha ya kuwajengea uwezo Wanahabari na vikundi vya Asasi za Kiraia ili waweze kutambua hali ya ubora wa ujenzi wa miundombinu ya Umma. Washa hiyo ilifanyika katika Kituo cha Kimataifa cha Mikutano cha Mwalimu Julius Nyerere (JNICC).

CoST inanuia kuwatumia Wanahabari na Asasi za Kiraia kupata taarifa za ujenzi wa miundombinu, hasa katika maeneo ambayo CoST haifiki kwa urahisi, ambayo ni pamoja na Wilayani na vijijini. Taarifa zitakazotolewa zitaiwezesha CoST kufuatilia miradi hiyo kwa urahisi pale inapobidi ili kupata miundombinu bora na salama.

Katika kutekeleza azma yake, CoST imegundua kwamba Wanahabari na Asasi za Kiraia wanahitaji elimu zaidi ya kuwawezesha kutambua ubora wa miundombinu kwani wao si wataalam wa ujenzi ila kuna mambo ya msingi ambayo ni vizuri wakayaelewa ili watoe taarifa sahihi. Wanahabari na asasi za kijamii zitatumia vitini (tools) vilivyotengeneza CoST Tanzania kwa ajili hiyo.

Mwenyekiti wa CoST, Bw. Kazungu Magili ameeleza kwamba kazi kubwa ya Mkakati wa CoST ni kuendeleza uwazi na uwajibikaji katika mchakato wa ujenzi wa miundombinu ya umma. Imani ya CoST ni kwamba uwazi utapunguza maficho ya mapungufu yaliyopo kwenye sekta ua Ujenzi na hivyo kuwafanya watekelezaji wa miradi hiyo wazingatie ubora, weledi na uaminifu katika kutekeleza miradi ya Umma ya Ujenzi.

CoST ilianzishwa  mwaka 2007 huko Uingereza na kuzinduliwa rasmi 2008 Dar Es Salaam, Tanzania.  Baraza la Ujenzi la Taifa (NCC) linasimamia Mkakati huu ambao Mhimizaji Mkuu (Champion) ni Waziri katika Ofisi ya Rais, Manejimenti ya Utumishi wa Umma na Utawala Bora.

Mpaka sasa CoST imefuatilia miradi ya ujenzi wa miundombinu mbalimbali ikiwemo miradi ya Barabara ya Nelson Mandela, Ujenzi wa Chuo Kikuu cha Dodoma na miradi mingine ambayo taarifa zake zilishatolewa kwenye matamko mbalimbali.                                                                                                                                                                                                  

Imetolewa na:

Construction Sector Transparency Initiative (CoST) Tanzania

P.O. Box 70039, Dar Es Salaam

Tel: 0739500313

Mob: 0713620232