WAKULIMA WA MIWA BONDE LA RUHEMBE KILOSA HAWANUFIKI NA KILIMO

WAKULIMA wa miwa katika bonde la Ruhembe wilayani Kilosa wamelalamika kuwa hawanufaiki na kilimo hicho kutokana na utata unaojitokeza katika kuhakiki ubora wa sukari inayopatikana kutoka kwenye miwa yao wakati wanapoipeleka kwa mnunuzi ambaye ni kiwanda cha sukari cha Ilovo.

Wakizungumza katika  mkutano wa mkuu wa mwaka wa chama cha wakulima wa miwa katika bonde la Ruembe wilayani Kilosa,wakulima hao walisema  kwamba kukosekana kwa usimamizi thabiti kutoka upande wa wakulima wakati wa kuhakiki ubora wa sukari toka kwenye miwa yao kumekuwa kukisababisha kupata mapunjo ya gharama halisi ya miwa yao kutoka kwa mnunuzi huyo.

Wakulima hao walisema wanachokitaka  wao  ni kupatikana kwa uwakilishi wa wakulima wakati wa kupima ubora wa sukari yao pale inapofika kiwandani ili waweze kujua halisi ya kiwango cha sukari yao.

Aidha wakulima hao walilalamika pia kupunjwa wingi wa miwa wanayopeleka kiwandani jambo linalowafanya kurudi nyuma kiuchumi sambamba na kuvuniw miwa kwa kuchelewa jambo wanaloamini linatokana na kukosekana kwa mwakilishi wa wakulima wakati wa upimaji kiwandani hapo.

“Wakati wa tunavuniwa miwa sisi tunaona ni mingi na yenye ubora lakini cha kushangaza ni pale tu unapofika kiwandani tunapewa vocha ndogo ambazo hazilingani na ubora wa muwa ,na wakati mwingine utakuwa mtu analipwa kiasi kidogo kama shilingi 150,000 malipo haya hayakidhi hata gharama ya shamba uliotumia,”alisema Musa Mpunuge mkulima wa miwa

Wakulima hao walisema kuwa pamoja na kupunjwa wingi na ubola wa miwa lakini bado wanakabiliwa na changamoto kuunguzwa moto kwa mashamba yao mara kwa mara jambo linalolalamikia kuwa linaweza kupunguza ubora huo.

Joyce Kisaka mkulima wa miwa katika bonde hilo la Ruembe alisema kuwa changamoto nyingine ni kulipwa malipo madogo kutokana na umbali wa mashamba jambo linalowakatisha tamaa wakulima wengi wa bonde hilo.

Kwa upande wake mwenyekiti wa chama hicho Msabaha Nyembe aliwataka wanachama kutotumika vibaya na baadhi ya  wenzao kwa kutaka kuvuruga chama kwa maslahi yao binafsi, ikiwemo wanaoanza kampeni za kutaka uongozi ndani ya chama hicho.

Aidha mwenyekiti huyo alisema chama hicho kimeendelea kuimarika  siku hadi siku, na kwamba kimeweza kununua vitendea kazi kusadia kilimo na juvunaji wa miwa ikiwa ni pamoja na kata pila na mitambo ya kupakia na kushusha miwa yenye thamani ya zaidi ya shilingi 600 milion.